تنقو وتنقيب الذهب (2)
بقلم / إبراهيم العندي
بقلم / إبراهيم العندي
2 ابريل 2011
***
***
عمك تنقو دماغو الخالي
قال انا داير اريح بالي
...اسيب كل مهنه واي تجاره
واقوم للدهب الفي ابصاره
وحزم شنطتو قام بشويش
وقال لي العازه تسوي العيش
مسافر بكره اسوي قروش
تجهزي هسه صفيح قرقوش
وشرقت شمس الصبح الدافيه
وشال لجهازو وخيمة باديه
وفوق الراس طاقيه وشال
وركب البص الماشي شمال
وقبل العصر أذانو يحين
كان في دلقو هناك واصلين
ووصل ابوصاره قريب الغيبه
...ونصب الخيمه وقال ترطيبه
وجوه جماعه وقال بي بسمه
عبيد الله اخوان في القسمه
بدور عمال لجهازي الجي بي
وانا زول محظوظ والحظ ده حبيبي
حمل لجهازو علي الأكتاف
ومالقي عمال والناس آلاف
قاعد في خلاهو تلاته ايام
والدهب الغالي اباهو حرام
وفي اليوم الرابع قبل الشرقه
قرر يمرق آخر مرقه
وفوق وري صخره زي الوطواط
ده جهازو يصفر طاط وري طاط
ودنقر تنقو يحفر ويقلع
وبانت فجأة حجرتا تلمع
شالها جاري ولحق الخيمه
وجو التجار قاصدين تقييمه
وتنقو يصرح بيعكم شوم
انا ماشي ابيعها في الخرطوم
وصد وفارق ارض النوبه
وشال دهبايتو القدر الطوبه
وركب اللوري علي امدرمان
وصل سوق ليبيا بكل أمان
ضرب تلفون للعازه تعالي
عشان ماتشوفي الدهب الغالي
وجاتو العازه وقالا غنيت
وباكر ناخد اجمل بيت
واقرب تاجر قالو انا جيت
وشايل الدهب الشانو مشيت
وفك الصره وطلق الخيط
وطلعت حجرو من الجرانيت
والتاجر يضحك وعمك تنقو
قرب من المغصه يخنقو
هناك تعليقان (2):
التعليق
====
حسكو المحس
ياخسارة بعد تعبو دا يطلع قرنيت
Mano Mustafa
الله على الابداع
Mohaned Elsadig
جميلة بس بعد ده طلع مادهب مفروض كان تعملو دهن وتفرج لينا عم تنقو ولو لمره
Myada Abdulaah
بعد دا كلو ماطلع دهب
عادل سنوسي
ركب ماسوره هههههههه
فوفو زهرةالبنفسج
حرام ياتنقو ..أنت ماعارف أن ليس كل مايلمع دهبا
ههههههه هههههههه هههههههه ههههههههه
اللهم لا شماتة
صفاء الهادى
ماتزعل ياعمو أهم حاجه فكرة التجربه ذاتا
Gareeballah Abualsukkar
احلام كل المفلسين وانا منهم
محمد مرجان بشير
الظاهر عمگم دي خرف وباين انو الحظ حبيبو
Abdo Wedaa
جميله ولاكن النهايه محزنه
كان تجاملو شويه
Nasser Madin
يا خسارة حنني والله ... دائما حظه نحس
عادل سنوسي
خلاص ياشباب نعمل شيرنق نعوضو عن تعبو رايكم شنو
Alhaj Yousif
عمك عارضوا قوي ،في الكبدة يلقى عظم
Musab Alsabon
ظهر ذهب في اقصي شمال غرب امدرمان يا تنقو ؟
Amin Abdalla
والله فكره ياعم تنقو ...انا ذاتي ماشي معاك لكن استناني اجيب قرقوشي واجي
Musab Alsabon
شيلا موزه احسن حظك ما ، ، ، ، ،
عادل سنوسي
ياتنقو ماعزبتا في قبقبه مضايقنا
محمد قرين
سير وعين الله ترعاك لكل مجتهد نصيب
عادل سنوسي
انتو عارفين اليوم دا تنقو كان راكب الفيل عشان كدا النحاس بشوفو دهب
Ahwag Ismail
مامشكله ياعمو الضربه المابتقتل بتقوي بس المره الجاية بيع في مكان الدهب ذاتو
Anas Shkak
عمك تنقو دا مواسيره من امها
عبدو الراسطة
شايف يا عمو الزول داك تاجر ذهب لكن ما بشتري منك عارف ليه?
عادل سنوسي
انا بتبرع ليه ب2 جرام
Tyseer Hasan
خيرها في غيرها وإنشاء الله المره الجايه تلقي بس الصبر..
Samt Algsaid
عمو التنقو حتي الدهب دايرو
Amin Guevara
شوف عليك الله شايل قرقوش قال ماتمشي الجهاد احسن ليك
Samt Algsaid
عم التنقو ثانكس ع اللأيك
Abdo Wedaa
الدهب لايجده الي كريم فقد
Amin Guevara
ياعمك أنت فاكر الدهب لقيط برتقال
Amin Guevara
ياتنقو قبل تسافر اعمل لينا حفل وداع
عبدالباقي صلاح
ياعمك والله حيرتنا دهب عديل كده آقول ليك فكره آحسن شويه!!! أشتغل وزير مش آحسن
راندى اورتن
ياعمك الدهب ده زاتو محروس بالجن انساك منو انت جيت راجع حي دي براها سلامه كويس انك ما لقيت جن والله كان يطير ليك لمن تقول الروب
Najowa Elkhaldy
ياعمك هسي لو ماكانت قرانيت العازه كان نشفت ريقك بعايزه وعايزه أحمد ربك
Mohammed Khatim Khalil
لاكن التاجر داير يقشو عمك تنقو طلع تفتيحه.. وقال للتاجر عباره صريحه .. ده كان قرنيت انت كنت مشيت ما أتلفته ولا اهتميت ... التاجر عرفو طلع ود سوق وقام قال ليهو انا اشتريت .. اداهو قروشو وقال مبروك وعمك تنقو من الفرحه قرب يموت.. خته قروشو في مخلايتو وطبق العازه وقال يا فكيك ؟....
Amin Guevara
ما تخلي فكرة الدهب دي ارح نفتش الماذ
عبدالحافظ محمدزين
إضافه جميله ي محمد خاتم .. وعمك دا م محظوظ في حاجه كلو كلو ؟؟
عبدالباقي صلاح
ياجماعه في بئر قالو وقعت هسه في الدهب الله يستر علي عمكم مايكون شرتم خشمو هو ماشليق بكون في النص هسه
Rose Ahmed
يا عمو بركه الطلعته ليك بي جرنيت برضوا فايده لي حظك العاثر ده حظك في الكبده عظم ويا حليل العازه المشلهته معاك علي الفاااااضي
حنان سليمان
المنحوس منحوس ياعمو ولو ركبوا علي دماغو فانوس..
ميمي يوسف
الله معاك ماتنسانا ادينا من ٠٠٠
عبدالفتاح فضل المولي الحمري
يا زول والله ابراهيم العندي دا بفتش ليهو بالقروش ما لاقيهو
Eman Mahjoub
حظك شبه حظي ياعمو
Samer Abd Almonem
اكان ماشي قبقبه ياتنقو قبقبه بقت عباره عن حفر الدهب لقطو القبلك اخير ليك شقلك من الدهب
Alwaly Atta
يا شباب معاكم دهابة
Shazly Alhadary
ياعمك كدي برد المنقة يانمش كلنا يا ماتمش _حظك جي كده تسوقنا معاك
نبيل حامد
يا عمك استهدي بالله و الغي الفكرة دي من صلعتك دي خالص
خالد محمد
والذين يكنزون الذهب ولا ينفقونها في سبيل الله فبشرهم بعذاب اليم
Albadawey Silverkid
والله مسكين لمافكر يلم قروش مشا الحفر
محمد حمودي
عمك تنقو ركب الباص ووصل المنطقه وحفر السا س لقأ سبيكه شبه الكراس قال الحاجيه دي هسي ليها اساس وبقأ مليار دير وليه حراس
Salih Azhri
عمك تنقو امشي نوم وريح بالك اي حاجة بتخربا
محمد المبارك
هههههههههههههه انتو عارفين عندنا واحد من الحله زي عمك دا مشي الدهب, بعد اسبوع لقي ليهو علبه تونه .وكمان فاضيه
ربى عبد الرحمن
انت مابتحتاج للدهب عشان انت الدهب زاتو
محمد جبر
عمك قام اشترالو جهاز وشال معاهو لمبة جاز وكم صينيه وشال بوتجاز ومعاهو كمان انبوبةغاز
Osman Awad
والله يا عمك انا من ود بشاره .دهب مافي .دبيب كتير . وعقروب. عشان كدي غير رايك .بصيحة مجرب
بت الياس دقاش
ياعمك دهب شنوفي السخانه دي ده ماسوره شركه ؟ ارجع نوم يا عمك
إرسال تعليق