عمك تنقو نهاية فضولي فكرة زاهر الطيب

تنقو نهاية فضولي
فكرة: زاهر الطيب
***
عمك مرة قصد الراحة
سافر اوروبا تغيير وسياحة
أول دولة زاره فرنسا
عالم تاني يا زول أنسى
آخر متعة وفيها اتفسح
ايفل ولوفر وابرا ومسرح
عمك شاف الناس الدايشة
عايز يعرف كيفن عايشة
عمك تنقو قرا إعلان
بكره زواج البت فيفيان
قال لي نفسو نمشي نبارك
ونعرف حاجة برضو نشارك
عمك تنقو اخـدو فضـول
قال ظابط جدا كدا يا زول
يم الموعـد دخـل القاعتة
والاستقبال وين يا جماعـة
عمك وقف بين بابين
باب شمـال والتاني يمين
في الصالة دخل فضول وشمار
العريس يمين وعروسو يسار
لصاحب الدعـوة أنت اختار
عمك تنقو بقى محتار
إختـار الباب الـ ناسـو كتار
المعاهو هدية الباب الاول
وفي حاله عدمو التاني اتفضل
عمك تنقو راح متسارع
الباب التاني بوديك للشارع
ديل خواجات والله صراحة
كيف ورونا الطرد براحـة

عمك تنقو وطارق السويدان

تنقو وطارق السويدان
فكرة/ زاهر الطيب
التطوير الذاتي
****
عمك بسأل نفسه سؤال شافي
ايه في الدنيا تكوني أهدافي
ولدوني أعيش فقط واموت
كأني ما كانت زول موجود
عايز حياتي تبقى مثيرة
وللعالم حولي اخلّف سيرة
بدل حياتي تبقى عقيمة
لازم اقدّم حاجة عظيمة
وتكوني شخصيتي ذات قيمة
هيأ نفسـو وأتحمس وثار
كسلو وخجلو نفضو غبار
علشان تنقو يكون جادي
يحتاج توجيه وتطوير ذاتي
عمك تنقو الما بتردد
سحل اسمو في اقرب معهد
دخل القاعـة وكان متحسس
مع الطبقة الهاي بقى متوجس
طارق يشرح وبروجكتر ومنصه
العندو إضافة توضيح أو قصـة
ح اجدع الكورة وياخـد الفرصة
عمك تنقو زاد إصرار
زي سوبر مان في الجو طار
صبّ الكورة بثقة وتأني
قال انتو جميع مش أحسن مني
وقفوا لتنقو ادوه تحية
عمك تنقو زول شخصية
طوّر نفسو وعاش مسرور
أصبح مؤثر ويمثل دور
بي رايو يشارك وبقى مشهور
عمك الكان خجول كسلان
عايز يحاضر مع السويدان

تنقو يصلح سرائر نسخة مجلة الصبيان

عمك تصليح السراير

            نسخه قديمة

                 *** 

عمك تنقو ماشي وساير
ينادي ويقول العندو سراير
ندهت ليهو واحدة ضخمخم
كتلة لحم وشحم ملكدم
جابت ليهو سرير مهتوك
يايات ممطوطة وفاقدة سلوك
ضحك العم ضحكة خفية
وقال للكتلة حرام ياولية
سريرك ده محتاج كمرات
وارجل صبة وسيخ شبكات
قبضت عمو وقعدت فيهو
مرقت بطنو بي نخريهو

تنقو يسخن في العازة فكرة زاهر الطيب

تنقو اول مرة يسخن في العازة
تاريخ: 5/7/2011م
فكرة زاهر الطيب

****
عمك تنقو قالها نصيحة
قال العازة فاضحاني فضيحة
عايز الليلة معاها يسخن
يبقى مزفت برضو ويعفن
قال للعازة تكتري كلامك
بيت ابوك هداك قدامك
عمك اصبح طبعو شين
ادى العازة كمان كفين
خلى العازة قاعدة تبكي
تدعو عليه ولربها تشكي
***
اقيفوا يا ناس شوية معايا
القصه طويلة ما ليها نهاية
عمك تنقو سواها حكاية
بكلم نفسه قدامه مرايا

تنقو وكلب الصيد فكرة زاهر الطيب

تنقو وكلب الصيد
فكرة : زاهر الطيب
تاريخ:1/7/2011م
***

عمك تنقو جابو جديد
...جاب للعازة كلبة صيد
قال للعازة استهدي وروقي
دي احسن كلبه ونوعها سلوقي
كلبه اصيلة ونسل مدرب
تقبض غزالة وحتى الارنب
جاهو محجوب قاصد الفزعة
قال يا تنقو حصلني بسرعة
أرانب دخيلة من إسبوع
هجمت جملة على المشروع
عمك قال ما تشيل هم
حالا اساعدك ياابن العم
قال للعازة ناوليني الحربة
وشوفي الليلة شطارة الكلبة
الارانب جارية عشان تتضارى
من الكلبة التابعة اثاره
مرت ساعة واتنين وعشره
وكلبة عمّك خلف الشجرة
مع الارانب تقشر جزرة
بالغت يا تنقو معانا عديل
كلبة صيد ولا عميل

عمك تنقو نقّاش مجلة الصبيان

عمك تنقو نقاش
مجلة الصبيان
من مكتبة دار الوثائق القومية
***
عمك تنقو بقى نقاش
علبة وفرشة كمان رشاش
قاول واحد عنده عماره
بوهية وجير معاها إنارة
ضرّب شغله وقبض عربون
إشترى حاجات زي ما تكون
عمك جاهل بالالون
وذوقه الفني كمان تعبان
فضل يسوط بوهية وجير
طلعت خلطة ملت الزير
خت كراعو فوق السلم
وقال لي نفسو برافو معلم
أول لطشة كانت عورة
شافوا الراجل وهاج في ثورة
هزّ السلم وهـزّ ضلوعة
وعم طار وقع بي دموعه
انقلبت فيه كل الخلطة
وفوق الصلعة جات منجلطة
وشو وحسمو عام في بركة
قام متلوّن زي الفِركة

تنقو في المشرحـة فكرة زاهر الطيب

تنقو في المشرحة
فكرة:زاهر الطيب
تاريخ التاليف اليوم :28/06/2011م
***
في اكبر حتة تنقو بخافة
اتعين في المشرحة عامل نظافة
قال حاكماني والله ظروف
ح ابطل تردد وابطل خوف
الدكتور قال يا تنقو قوم
جمع اغراض دا المرحوم
نضارة و ساعة بطاقة وخاتم
كلها امانه وخليك فاهم
عمك تنقو عامل شاطر
قال يا دكتور مفهوم حاضر
بدا عمك مرحلة اولى
قلع الجزمة بكل سهولة
عمك يقلب فيه يمين وشمال
قام بي واجبو بدون إهمال
خلع الخاتم معاهو الساعة
أكيد يا تنقو عايزة شجاعة
يجر في الخاتم حالف يطلع
من الخوفة قلبه اتقطع
يشد في يده قوي يلف
من يده التانية جاهو كف
مسكت عمك حمى ورجفة
أغمى عليه ودهو المستشفى
كان المقلب بكل صراحة
كاميرة خفية لربيع ربيع طه
***
(( مع خالص تحياتنا للكوميدي ربيع طه الكاميرة الخفية ))

تنقو ولبن العازة فكرة زاهر الطيب

تنقو شرب اللبن
فكرة زاهر الطيب
تاريخ التاليف:28/6/2011
***
لبن العازة في ربع التمنة
عايزه تصنع زبادي وسمنة
قالت يا تنقو ماشة وجاية
اياك في غيابي تسوي حكاية
ختي في بطنك بطيخ صيفي
امشي مشوارك اوعا تخافي
خلى العازة طلعت حبة
دخل المطبخ شوية ادبة
قاعد يشمشم يحاكي كديستو
في لبن العازة خت نفيستو
قام بالتمنة ونفخ الكرشة
غلبو يتنفس او يدش
جات العازة وقعد اذبذب
بقى يتحلف قال ما مذنب
قالت العازة كمان بتكذب
انت يا تنقو فقدت المنطق
اللبن في شنبك عايزني اصدق
عاقبت تنقو ينط و ينطط
بنخرتو اللبن وبخشمو ينقط

تنقو زعيم القاإأإأإأعدة فكرة زاهر الطيب

تنقو زعيم ال ق ا ع د ة
فكرة زاهر الطيب
04/05/2011
***
عمك تنقو في عزّ الليل
قال ياناس انا قلبي دليل
حلمة تفسيرها شين بالحيل
إن شاء الله تكون أضغاث احلام
خبر بن لادن ما اي كلام
قالوا ارهـابي كدا سمّوه
جثمان شالوه خبوه وخموه
في وسط البحر راحو رموه
امريكا ابتهجت وقالوا سلامة
اتحقق ليها جميع احلامه
سكروا وابتهجو وسووا كرامة
عمّك قام مفزوع ويناهد
قال ح يمشي ويبقى مجاهد
جنبو العازة ممحنة قاعـدة
قال في نفسه دي زعيمة القاعدة

تنقو رومانسي فكرة/مهدي فاضل

تنقو رومانسي
بقلم:Mahdi Fadul
مشاركة: كريم احمد
03/05/2001
=====

عمك تنقو الديمة مشاتر
عمل رومانسي وكلو مشاعر
قال ا لعازة بريدا حلاتا
شوال سكر كوم شكولاته
يوم العازة جابت شاي
عمك قالها : ابقي بجاي
داير ابرهن انك كستر
وجات العازة تميل تتبختر
طمس ايدها في كبايتو
عشان يثبتلها صدق روايتو
ايد الحاجة عديل اتسلقت
بافي الشاي فوق صلعتو دلقت

عمك تنقو مصارع (2) بقلم زاهر

عمك تنقو مصارع (2)
فكرة / زاهر الطيب
3/مايو/2011م
*****
عمك تنقو شال سكينة
حالف قال يضبح جون سينا
انت يا تنقو اكيد حقار
انت مصارع ولا جزار
عمك تنقو دخل مبسوط
كان شعاره سكينة وسوط
موسيقة الدخله ما بخفيها
النار ولعت بقلبي اطفيها
فنانو المفضل قال قيقم
شبح عمك خرج من قمقم
في وسد الحلبه وقف متسمر
كان جون سينا فوقه يحمر

تنقو الطمّاع فكرة زاهر الطيب

تنقو الطماع
فكرة / زاهر الطيب
03/مايو/2011م
***
عمك تنقو قال مشغول
قال للعازة ما عايز زول
قفل الغرفة عمل زغلول
كله عشان سندوتش الفول
عمك تنقو ما هو تقيل
الا الليلة شكله بخيل
كمل فوله مرق إدبه
لقى العازة شايلة مربة
عمك تنقو جاته النكبة
قال للعازة عايز حبه
عمك يبكي زي الشفع
عشان مربى قعد اتشفع
يحنس فيها و عينه بتدمع
قال الطمع عارفة ما بجمع

تنقو والجو الرهيب فكرة زاهر الطيب

تنقو والجو الرهيب
فكرة زاهر الطيب
01/مايو/2011م
****

عمك تنقو تفكيره غريب
قال الجو الليلة رهيب
فكر عمك تنقو شوية 
قال للعازة عايز شيه
قالت حاضر هب الجمرة
خليها لامن تصبح حمره
عمك يقلب فيها بالكمشة
في يد العازة جاتا التشة
خلى العازة تلف في إيدا
عمك فكر فكره جديده
خم الشيه كلها في كيس
قال الجو جو جكيس
عمك ماشي يشوف له صديقة
في اقرب شارع حتى حديقة
كلاب الشارع شمو اللحمة
حولين عمك عملت زحمة
جدع الكيس جرى للعازة
رقد اتمدد كانه جنازة

عمك تنقو طبيب نفساني فكرة/ زاهر الطيب

عمك تنقو طبيب نفساني
فكرة/ زاهر الطيب
27/إبريل/2011م
***
عمك تنقو رجل إنساني
بقى في الطب طبيب نفساني
...شاف الناس كتير بتعاني
قرر يعالج ويستشير مجاني
عمك تنقو الراجل البركة
قال جيبو لي الخارج الشبكة
عمك تنقو بخبره يعالج
عقد نفسيه ومفوّت وحالج
مشاكل الناس الكانت اكبر
عمك حلاها وفضى العنبر
اجهـد عقله وما إرتاح
عمك جن وحجزو لو جناح
إنت يا تنقو كتر خيرك
تصعب مصيبتك وتهون لي غيرك

نادى تنقو للأشبال فكرة/Kareem Hameed

نادى تنقو للأشبال
فكرة/Kareem Hameed
***
كل ما العازة إجازة تسافر
عمك بى أفكارو يبادر
رسل نادى عيال جيرانو
وفى الدكان لصّق إعلانو
كون مع تنقو إجازة الصيف
فى كل لعبة حتبقى حريف
وعمك تنقو شنو الماعندو
باسكت وعقله كمان تاكندو
جوهو الشفع كميات
حمادة ونادر وبت نعمات
شافع السرة وبت قسم الله
بيت عم تنقو يفضى ويملا
فى حوش عمك و الصالون
خطط وحفـّـر وركـّب قون
وفجأه الحوش بقى زى الروضة
وكل البيت عاماهو الفوضى
ولامن جا الإسبوع الرابع
ترفع طوبة تلاقى الشافع
ودون انذار الباب ما خبط
جات العازة وتنقو اتورط
عقاب العازة الدايماً رادع
قش الحوش معاهو الشارع

تنقو والاعشاب فكرة/Kareem Hameed

صلعة تنقو والأعشاب
فكرة/Kareem Hameed
***
عمك تنقو اللسه شباب
شايف روحو حلو وجذاب
يومى يبخبخ ريحة جديدة
يفكّ الشكــّة وتانى يعيدا
عمك فكر قال ماناقصو
غير شعرات سمحات فى راسو
و طبعا عمك ما بتجارى
وفى الأعشاب كان عندو بصاره
زيت صبار وشوية حلبه
وحاب كمون مسحون فى علبه
وكل مايصادف شجرة غريبه
تنقو يختها فى التركيبه
وبعد اكتملت خلطة عمك
شال بالكوز فى راسو ودلك
وفورا من المرة الاولى
خلطتو جابت ليك مفعولا
وبدل الشعر الكان راجيهو
نجيلة وشوك صبّار قام ليهو

بنت تنقو والعريس فكرة / Rawia Alshaikh

عمّك تنقو والعريس

Rawia Alshaikh

‎****

عمك تنقو عندو بنات
واحده بريده اسمها حياة
عمك تنقو جاتو حياة
قالت بابا حبيت بالشات
عمك تنقو بشرب شاى
قال لحياة اسكتى ساى
يابت هووووى ودعمك جاى
وقال للعاذه تبقى حماى
جات العاذه قالت خير
منو ده!! ودعمها الخير؟!
دايرينو وزير دايرينو امير
عمك تنقو قام مهموم
خربو عقولهم بالخرطوم
اعمل ايه قولو معاى
بتى حشاى حبت وراى
حراااام يا ناس دى جناى ...

عمّك تنقو طبيب فكرة/Adli Omara

عمّك تنقو طبيب

فكرة/Adli Omara‎

عمك تنقو طبيب
***
عمك تنقو قرر يبقى طبيب
وقال دا مناهو و منو قريب
وغير الطب ماعندو بديل
يعالج يداوي كل عليل
وضرب أخماسو في أسداسو
وهاك ياعزيمة وقوى حماسو
ونوى يمسك الطب دا من ساسو
سنن قلمو وشال كراسو
وكبا العلم بحور وبحور
وتم مرادو و بقى دكتور
وطارت عازه فرح وسرور
وقالت يعلي مراتبو ويرفع راسو
وتنقو الطب دا ياهو مقاسو
وقطعت حلمو غنماية بله
وصوت العازه شكيتك الله
يا عنز بله رميتي الحله
وعمك تنقو صحا من نومو
يقطع بله و يلعن يومو

تنقو طبيب اسنان فكرة/ محمد ميرغني ابو الحسن

عمك تنقو _طبيب اسنان
فكرة/محمد ميرغني
***
عمك تنقو في وسط الحلة
زهج اتنفر ومنها مل
قال لي صاحبو الجني حمادة
زور لي يا راستا شهادة
مشى اتصور وصلعتو سادة
وقال عايز يفتح ليه عيادة
أشهر تنقو في السودان
بقى في لحظة طبيب أسنان
بس احتار في العدة وحاجتو
فتش وفتش في الشنطة بتاعتو
لقى شاكوش ومعاو زردية
ومفتاح بلدي وموس هندية
وجاهو زبون متألم وشاكي
من الضرس الزول متباكي
عمك بي شاكوشو الكارب
راح في الضرس السالم ضارب
زولنا نعل اليوم الجابو 
عيادة تنقو ونادى جنابو
قال في ضرسو عايز دية
اقل حاجة حيدفع مية
عمك تنقو شهادتو اتكشفت
وعيادتو خلاص ياناس اتقفلت
وجاتو العازة كمان زعلانة
ودفعت لي محبوبها ضمانة
عمك قال السجن أرحملو
من العازة والحتعملو !!

تنقو مصوراتي فكرة/Wadah Mohamed

تنقو مصوراتي
فكرة/Wadah Mohamed
***
عمك تنقو فتح إستيديو
صور ألون .. أسود وفيديو
قام طوالي جاهو زبون
قاشر متلمع ريحتو صابون
عمك تنقو وقف إتبسم
سأل القاعد كيف يتفهم
للعدسه يعاين يوزن بصرو
يفكفك وشو دون ما يصرو
زمجر صاحبك مرقن سنونو
نيران الشر تلعب في عيونو
عمك سألو يبطل جنو
وكان عالجن الناس عارفنو
زولك نط بطريقه غريبه
وعمك كانت إيدو قريبه
قومي يا الكاميرا أقع إنكسري
صرصر عمك وصرخلو بتعرف تجري

تنقو كمسنجي بقلم/حسن عبدالمنعم

تنقو كمسنجي

حسن عبدالمنعم

***

عمك تنقو بقى كمسنجي
سيجارتو طويلة نوعة برنجي
كلاكلة اللفة اللفة اللفة
من الصباح ما زهج الوقفة
عشان ما يجازف حق القفة
يعيش اولادو شريف بعفة
والعازة تدفع حق الصرفة
عشان ما تصلح عرش الغرفة
عمك تنقو كره الشغلة
قال مامكن حلفي انسلة
احسن اشوف لي شغلة بديلة
ضل ورطوبة وقعدة طويلة
هيي ياعمك هو نحن عطالة
اوعى تجازف دي البلد بطالة
اصبر ياعمك فالصبر اصالة
أحتمال تترقى سواق حافلة

عمك تنقو ونانسي عجاج بقلم محمد ميرغني

عمك تنقو وحفلة نانسي
فكرة: محمد ميرغني
إضافة زاهر الطيب
***
عمك تنقو طفشان ماشي
قرا في اليافطة في حفلة لنانسي
قال يا سلام نانسي رقيقة
فنانة ظريفة وبرضو أنيقه
ح اخش الحفل باي طريقة
وكان الليلة وحفلتا باكر
وعاوز يجازف ليه تذاكر
ظبط امورو وشك هدومو
وسفة كمان نفخت قدومو
وغطا الصلعة بسايد كاب
عشان الجنبو يقولو شباب
دخل الصالة من سبعة ونص
نفسو بس يسمع آه ونص
وقعدن جنبو بنات سمحات
وبقى بتحسر عمرو الفات
وبدت الحفلة كمان بي مزاج
وكان الصوت صوت نانسي عجاج
عمك تنقو الكان ناسي
شكلة ملخبط بين نانسي ونانسي
وعمّك تنقو  نظرو ضعيف
كانت زحمة عامله كيف
لمن غنت حتى الطيف
عمك قلبه قرب اقيف
قال يا أستاذة ليك ممنون
طلبي تغني شقي ومجنون
وبرضو كمان الله يخليك
تغني للعازة الله يهديك

زهج تنقو وزهج العازة (مجلة الصبيان)

مشهـد اكشن في البيت
مجلة لصبيان
****
عمك تنقو فى يوم زهجان
ومن العازة كان قلقان
قام على حيلو أداها كف
خلى العازة تدور وتلف
بعد شوية كربت توبا
ومن الرف شالت مركوبا
شالت تنقو من كرعيهو
وبالبرطوش هردت رجليهو
اتلمو الناس وضحكو عليهو
وقالو خلاص يا العازة أعفيهو

عمّك تنقو تاجر إبــر فكرة زاهر الطيب

تنقو تاجر ابر
فكرة/ زاهر الطيب
تاريخ اليوم 20/ابريل/2011
***
عمك تنقو سافر برّه
...شاف الغربه صعبه ومرّه
عمك جاته اجمل فكرة
ينهي الغربة في اسرع فترة
إشترى في لحظة مليون إبرة
**
قال تجارتي تكون ما خفه وزنه
في نفس اللحظة عالي ثمنه
**
ربح بسيط يبقى مبارك
لا فيه ضرائب او حتى جمارك
**
قالو عمك اكيد مجنون
خش السوق الما مضمون
100 جنيه الابره تكون
اضرب ميه في مليون
**
بالتفكير بقى متفرد
وأكبر تاجر إبر ومورد
**
التجاره عايزة زكاء ومهارة
وقراية السوق معاها شطارة
**
دقش السوق وماهو مبالي
يبيع قطاعي وكمان إجمالي
اصبح تنقو رجل راس مالي

عمك تنقو وبنات الطب بقلم Fttah fado

وعمك وبنات الطب
بقلم/Fttah Fadol
**
عمك تنقو فكر إحب
شكا وفات كلية الطب
قابل لينا وقابل نوسه
مالو ومال العازه وعوسا
بقي متحنكش وقولوا رطانه
وفوق لي داك مادغلو لبانه
وفوق البينش تلقاهو مصنقر
يلابع دي ومع ديكا يهظر
عمك قال كدا دي الترطيبه
وبت الطب اياني حبيبه
عمك تنقو بدون ما ادري
جاتو العازه تكورك تجري
قالت ليو ياخ قطرك فات
خلي الطب. حب في الدايات

تنقو لا يعرف اليأس فكرة زاهر الطيب

تنقو لا يعرف اليأس
فكرة زاهر الطيب
5 ابريل 2011
****

عمك تنقو كان في صباه
برضاء الناس الله حباهو
كان في المدرسة شاب مثالي
ما مغرور ولا متعالي
معروف تنقو شاب نظامي
وعود نفسه يكون عصامي
تنقو حياته كانت احلى
يهوى سباحة وقدم وسلة
عمك مرة نصفه انشل
تقرير الاطباء شكله مخيف
امل شفاه قالو ضعيف
الشاب تنقو ماهو سعيد
يقضي شبابه في كرسي قعيد
انت يا تنقو اوعك تحزن
علاج طبيعي شوية اتمرن
ان شاء الله ترجع احسن
تنقو يا تنقو الكله عزيمة
ما عرف اليأس ولا حتى هزيمة
خطوة خطوة شغال تمرين
بنفس الحالة من شهرين
في رياضة المشي حابي يشارك
مشى للمشرف واسمه مبارك
قال يا أستاذ أرجوك ارحمني
من فريق المدرسه لا تحرمني
قال يا تنقو اكيد اتفضل
قدر طاقتك ما تستعجل
الامل الفيهو لطاقة اتحول
في الحالات الخاصة طلع الاول
اصبح تنقو بعزيمة مواصل
رجع زي اول كانه ما حاصل

المحكمة (2) بقلم سارة جنقوما

تابع قضية تنقو
بقلم سارة جنقوما
***
عمك تنقو قلبو كبير
قال للعندي صباح الخير
فات العندي وجل سلامو
وماشي يكتح بي قدامو
زعلان العندي شديد ماراضي
عشان العملو امام القاضي
قال ياتنقو عملتها شينه
عند القاضي كمان تشكينا
عمك كورك وقال للعندي
انا جبت كلام مغلوط من عندي
كلو ده حاصل وعندي دليل
حيط الفيس ذي جمل الشيل
قالو العندي حرام ياتنقو
ساره وزاهر يوم يتشنقو
كلامك صاح والفيك قلناهو
وياما كتير ماوضحناهو
عشان مايضحكو فيك شماتو
أصلو المؤمن لأخوه مرآتو
قلنا نساعدك نشوفلك شغله
وآخرتا تفعل هذي الفعله
عندي وزاهر بشيلو الحاره
بس ياخ ايه ذنبها بتنا ساره
عمك دخل القول في راسو
وقرر يصالح نفسو وناسو
سحب شكواه من عند القاضي
وقال يااخواني سماح واخواتي

تنقو في المحكمة بقلم ابراهيم العندي

تنقو في المحكمة
بقلم إبراهيم العندي
3/ ابريل /2011
***


تنقو الليله حكايتو جديده
وماظنيت الفيس بيعيده
حكايه اريتها كانت حرفه
اتبهدل فيها وجابلنا طرفه
دي حكاية عمنا يااخوان
ماحصلت قبلو من الشيطان
ادوها الصنه بدور احكيها
وحيطة تنقو نشخبط فيها


وعمنا تنقو الجاتنا اخبارو
وقايل نفسو بدس اسرارو
ماعارف الحيطه بقت اضنين
تسمع للمخفي ومابي يبين
تنقو الشاف الحاله بغيضه
بشيش ادبه وشالو عريضه
داخل في المحكمه قصد القاضي
يحكيلو الحاصل بالماراضي
وقدام القاضي الناس قاعدين
استلم الورقه ونادي منادي
ادخل ياتنقو ودورك بادي
ودخل العم في داخل القاعه
زعلان مكبوت والعين دماعه
وقالو القاضي اتحدث قول
قرينا عريضتك ومامعقول
ياتنقو الجبتو ده شئ غريب
وشكواك الفصل معاها صعيب
ونطق العم بي صوت مبحوح
مولاي انا زول مظلوم مجروح
مولاي انا داير أشيلك حالي
انا زول شغال وبربي عيالي
مولاي الشعراء اتقلبوا عليا
وشنفوا حالي بقولي أزيه
يكتبوا فوقي سنين وسنين
وانا دايما ساكت وانا مسكين
بقولوا علي انا تنقو الفاشل
وانا زول شغال والدنيا مشاغل
انا داير اشكيلك واملأ دفاتر
وبالأول فيهم تقبض زاهر
ده وليد الطيب قولو سليط
بقوافي تزعل ماها بسيط
والقول البحرق كلمتو حاره
واحدة فيهم اسمها ساره
وانا زول محترم ونشيط وافندي
كيف يكتب فيني وليد العندي.
والشعراء كتار ياسيدي القاضي
انا كنت بعدهم بس مافاضي
راجياني العازه وراجع هسه
لازم بي سرعه تحدد جلسه
والمحكمه تعقد وعندي شهود
كل زول في الفيس قاعد موجود

تنقو تنقيب الذهب (2) بقلم إبراهيم العندي

تنقو وتنقيب الذهب (2)
بقلم / إبراهيم العندي

2 ابريل 2011
***

عمك تنقو دماغو الخالي
قال انا داير اريح بالي
...اسيب كل مهنه واي تجاره
واقوم للدهب الفي ابصاره
وحزم شنطتو قام بشويش
وقال لي العازه تسوي العيش
مسافر بكره اسوي قروش
تجهزي هسه صفيح قرقوش
وشرقت شمس الصبح الدافيه
وشال لجهازو وخيمة باديه
وفوق الراس طاقيه وشال
وركب البص الماشي شمال
وقبل العصر أذانو يحين
كان في دلقو هناك واصلين
ووصل ابوصاره قريب الغيبه
...ونصب الخيمه وقال ترطيبه
وجوه جماعه وقال بي بسمه
عبيد الله اخوان في القسمه
بدور عمال لجهازي الجي بي
وانا زول محظوظ والحظ ده حبيبي
حمل لجهازو علي الأكتاف
ومالقي عمال والناس آلاف
قاعد في خلاهو تلاته ايام
والدهب الغالي اباهو حرام
وفي اليوم الرابع قبل الشرقه
قرر يمرق آخر مرقه
وفوق وري صخره زي الوطواط
ده جهازو يصفر طاط وري طاط
ودنقر تنقو يحفر ويقلع
وبانت فجأة حجرتا تلمع
شالها جاري ولحق الخيمه
وجو التجار قاصدين تقييمه
وتنقو يصرح بيعكم شوم
انا ماشي ابيعها في الخرطوم
وصد وفارق ارض النوبه
وشال دهبايتو القدر الطوبه
وركب اللوري علي امدرمان
وصل سوق ليبيا بكل أمان
ضرب تلفون للعازه تعالي
عشان ماتشوفي الدهب الغالي
وجاتو العازه وقالا غنيت
وباكر ناخد اجمل بيت
واقرب تاجر قالو انا جيت
وشايل الدهب الشانو مشيت
وفك الصره وطلق الخيط
وطلعت حجرو من الجرانيت
والتاجر يضحك وعمك تنقو
قرب من المغصه يخنقو

عمك تنقو رجل مرور (2) فكرة زاهر الطيب

عمك تنقو شرطي مرور(2)
فكرة زاهر الطيب
تاريخ: 2 / ابريل/2011
***


عمك تنقو اليوم مسرور
اتعين رسمي شرطي مرور
قاشر عمك لابس الكاكي
اجمل منظر وعمك شاكي
خاتي في خشمو كمان صفارة
من الشمس لبس نضارة
عمك تنقو شرطي تمام
وخلى الحركة تنساب بي نظام 
وكل سائق رابط حزام
جات العازة بكل بجاحة
خلت عمك وسط كتاحة
قال يا وليه سوقي براحة
شال الرخصه وشال مفتاحة
قالت يا جنابو كدا بصراحة
انا بت ناس وبت مرتاحة
امشي يا تنقو بعيد والعب
خليني اقولك معاي ح تتعب
انا فلانه بنت فلان
وراي رجالة وضهري ملان
قال ما تقولي قريبك وخالك
حتى إن شاء الله جنابو مالك 
علشان اشرح لهيو كدا إهمالك
قال ليها يا وليه بلاش محسوبية
هاك إيصال مية % المية
عمك قال الليلة يا فرده
اكيد راجياك احلى رفده
رجع المكتب زي سارق سرقة
سلموا عمّك ظرف وورقة
عمك تنقو بشريط اترقى
ادوه وسام اخلاص وجدارة
قام حياهم بتعظيم وإشارة
اقيفو يا جماعة هنو وحيو 
ده عمك تنقو نصبح زيو
كان المشهد فعلا حاصل
تابعو الباقي في إيصال وتواصل


****
إهـداء مع التحيه لسعادة العقيد /مالك في
برنامج إيصال وتواصل ، ومعا لقيادة راقيه وسليمة 

تنقو والنمر بقلم ابراهيم العندي

تنقو هجم النمر
ابراهيم العندي
****


 وزي محمود في اليوم التاني
ساق نعجاتو رتع وحداني
وخلف الوادي سمعلو مواء
وظهر الوحش هداك وجاء
نمرا جاهو بيقفذ عاتي
وشافو العم متل البعاتي
جسمو اتلج وصوتو اتكتم
غلبو صراخ بالخوف اتبكم
وضانو السارح فرا اضنيهو
وعين الوحش تراقب فيهو
و اكيد الوقفه تجيبلو الزهجه
ونط النمر في اقرب نعجه
وتنقو يتمتم نم نم نم
وحرف الراء ماداير يتم
وسمعوا النمر اتوجه جاهو
وباقي الغنم اتشتتوا تاهو
قفذ النمر في راس العم
وكد الصلعه واصلها كم
طاسه صغيره كأنها عصيده
ومخلب فيها يجيبا هريده
وفجأة اتفك الصوت الكاتم
وحلقو اتمدد رقبة عادم
واي ورا وآي سمعوه الناس
ومافي وحيدا جاهو حماس
يلحق تنقو يقولو حباب
وقالوا العم واحد كضاب
حليل العم ياالعازه حليلو
النمر الجائع ساهر ليلو
يقرمش عضمو الناشفه ويبلع
يكسرد باقي الراس الاصلع.

تنقو وخبر الخزين فكرة زاهر الطيب

عمك تنقو والخزين
زاهر الطيب
25/12/2010
====

عمك تنقو طماع وبخيل
سايق حافلة ود قنديل
ايراد الجمعة إنت وحظك
ليك يا تنقو حلالك وحقك
**
يوم الجمعة جاتة احسان
الخزين يا تنقو في الانعاش تعبان
***
دفس الحافلة فل نسوان
وعايز يزيدها شوية كمان
***
زهجت فيه بت عمسيب
والله يا تنقو انت عجيب
طمعك ذاته مسيخ وغريب
**
شاف هنااااك حاجة الشفة
رجع عليها بي كل لهفة
ياريته عمك لا رجع لا لف
قالت انزلوا الخزين اتوفى

تنقو والنمر فكرة زاهر الطيب

تنقو والنمر
فكرة زاهر الطيب
تاريخ:23 مارس 2011
***

عمك تنقو اليوم يا اولادي
عامل راعي في بطن الوادي
مع غنم الحلة دائما سارح
ماشي معاها مكان ما تبارح
الوادي خطير ما فيو مأمن
عمنا تنقو ما مطمئن
حدث نفسه جاو وسواس
لو جاتني مصيبة وين الناس
عمك فكر يعمل خطة
كيف الناس ح تحل الورطة
قاعد يكورك يا ناس النجده
النمر يا ناس قريب زي جبده
قالوا يا تنقو ان شاء الله تموت
علشان تاني تحاكي الود محمود

نغمة الموبايل في المسجد فكرة زاهر الطب

تنقو نغمة الموبايل في المسجد
فكرة زاهر الطيب
تاريخ 30 مارس 2011

***
عمك تنقو دخل الجامع
كان في صلاته جدا خاشع
كم موبايل عملت رنّه
عمك تنقو جاته الزنه
كل مصلي فكره اتشوش
عمك عامل زي الاروش
قضى صلاته كدا بالعافية
قاصد اخلاص ونيتاً صافية
قال يا أخوانا ده اسموا كلام
مسيقى في الجامع والله حرام
عمك واقف يذكر وينصح
هزاز او صامت ليهم وضحّ
في نفس اللحظة ديك والحال
موبايل يرن يرن شغال
يقول في العازة الفراق بي طال
عمك سارح والغنا مواصل
من موبايلو ما عارف الحاصل
قالوا يا تنقو انت عجيب
تنصح فينا ما هو عيب
موبايلك حفله شغال في الجيب
عمك تنقو من الخجلة
بقى صغير قدر الفجلة
قال موبايلي نغمتو عادي
إلا دي عملوها اولادي

عمك تنقو والشيكات الطائرة (فكرة زاهر الطيب)

تنقو والشيك الطائر
فكرة زاهر الطيب
25/ديسمبر/ 2008م 
***


عمّك تنقو بتعرفوه أكيد
يا أخـواني ويا أحباب
زول زول الله ساكي العيشة
جاري وراها اساسق إدابي
همّـو  الأول يربي أولاده
يخرج جيل يفخر بيه و بالانساب
أولاد عمّـك ديل واعيين وناس راقين
فهم وثقافة ونشاط طلابي
لمن دخلوا الجامعـة هاك يا مشاكل 
جاتم نازلة من غير اسباب
رسوم في رسوم معاها هِـموم
عمّك فكّر بقى سبابي
يجاري العيشة ال ما بتتجارى
ولا ينحرف يبقى إرهابي
والعـازة تنقنق فوقو صباح وعشية
ويدعـوا عليها يقرصك دابي
كره العيشة وكره النِقـة وكره العازة
قال ماشي ابيت الليلة مع اصحابي
****
مشى لاصحابة ناس ود نايرة
يغير جو ودمـاهـو الفايرة
ياريت ما جاهـم أخير ليه العازة
تنقنق وتسبسب العيشة الطايرة
غسلو مخيخوا بي مشاريع
كلها لف في لف في دايرة
برّم شنـبوا وحـكّ الصـلعـة
وقال أجرب والصايرة صـايرة
لا همّـاه حرام لا غش لا خدعة
كل القصـة شيكات طايرة
خليها تطير محل ما تطير
ما كل الناس طايرة وفايرة
أول شيك سواه مليون وكمان البعـده 
وأكبر شيك لي ود نايرة
قال صاحبي بأخـّره ليـهو 
وزول بضمنّي والارباح جاريـة
لكن العكس كان الحاصل
خنقوا وزنقوا ومحاكم دايرة
إتبهدل حالوا والسمعـة  إتخربت
وبنيتو الكبيرة صبحت بايرة
ده الصحاه وصحى ضميره وأنب نفسو
كشف الحاصل مجرد حلمة صايرة
طبق نعلاتو قُبال تصبح رجع  للعازة
قام قال ليها أرحم إنت من أولاد نايرة 

عمك وسوداني ون فكرة زاهر الطيب

تنقو وسوداني ون
فكرة زاهر الطيب
27/3/2011
****

عمك تنقو قال بالبركة
نجرب نحن نخش الشبكة
***
نشوف لنا موديوم ارخص واضمن
علشان النت مرات بتجنن
احسن اجرب سوداني ون
***
أعمل إشتراكي كدا في ثواني
مبسوط متكيف من سوداني
اصبح عمك مروج إعلاني
**
النت فصل وجاته اللجّة
وعمّك تنقو قام إحتجّ
حلف عليهم بحماقة وزهجـة
أسي اقوم اسيح التلجـة
أمشي افضحكم في كل فجـة
***
من النت وعمك طش
جدع الموديم وحرد اتعشى

العجلة مجلة الصبيان

تنقو والعجلة
مجلة الصبيان
مشاركة:Amer Ahmed‎
***
عمك تنقو اجر عجلة
صنقر فيها زى السخلة
وقال الليلة اروح اتفسح
وابقى نضيف ما اتوسخ
ساق العجلة ومشى فى الشارع
مرة يبدل ومرة يصارع
عمك زاد السرعة وجاري
كمان بتحرفن وقف سداري
فجأ كراع العجلة انفكت
وعمك تنقو قعد يتلفت
جابو الاولاد للعجلة كراعه
وجدو العم جوة البلاعة
**
(العجلة هي بدال العجلة )

عمك تنقو طارت السكرة وفكت الفكرة

تنقو وقزازة الع ر ق ي )
بقلم: إبراهيم العندي
25/مارس/2011
****

تنقو المابيخاف العسكر
جاب عرقيهو وقرر يسكر
قال الدنيا مسيخه كئيبه
العرقي يودي لدنيا رحيبه
تقعد قعده وتعزم صاحبك
تطاقش كاسو وتشرب نخبك
دقش السهله وعدي حرازه
وفات الحله وجابلو قزازه
تنقو اتلبت رجع البيت
وجهز نفسو ونادي بخيت
قال ياصاحبي الليل ممدود
قعدة سكره تدور العود
***

نغني ونطرب ونروي مزاجنا
وعرق الجاو يبقالنا علاجنا
وبطي مكركبه وجعها شين
نشرب والله كريم بعدين
بشيشه اتبتب جاب كبايه
يخاف العازه تسوي حكايه
وقال يابخيت اقسم وادينا
نشرب نسكر من عرقينا
شرب الكاس وعيونو شرار
اتاري الجابو هو موية نار
صرخ عمك كورك ويك
العرقي ده حامض كبريتيك
وقع العم في الحال يتلوي
وصحت العازه وهاك ياعوه
وجابوا البوكس وتنقو يفطفط
يكرفس رجلو وصاحبو يمطمط
وديك العازه الليله تسكلب
وموية النار في بطنو بتقلب
ودخل الراجل في غيبوبه
ويبيو واوروروك حي ووبه
حليل العم تبكيهو وليه
وبالنقاله علي العمليه
نضفو بطن العم بالليفه
وجابو العنبر وحالتو خفيفه
فاق في الاخر وداك هضريب
العازه العازه اديني حليب
وعين الزوجه دموعها جاري
وشتت صاحبو رجع كداري
وفتح عمك تنقو عيونو
وشاف العازه وجن جنونو
قال يابخيت دس الكبايه
وخبي العرقي العازه دي جايه
حضنت تنقو العازه وتبكي
عرقي يطير جاب لينا الشبكي
تشرب موية النار ياراجل
ومالك ومال السكر القاتل
عاملين فيها شباب وشفوت
لو مااسعفتك كنت تموت
وانا كيف اقبل تمشي تسيبنا
وانت ضرانا وإنت حبيبنا
رجع العم لي وعيو وصحصح
وفهم الحاصل وبقي يتنحنح
قال ياالعازه انا برضي بريدك
وانا حاميكي وقوة إيدك
وقال التوبه التوبه التوبه
ونفسي انا كيف امرت بذنوبه
وربنا قال النفس اماره.
وتاني أنا تب بعدلا مساره
بصلي واصوم ومابشرب تاني
العرقي قزازتو علي حرماني
أنا مؤمن خايف الآخره وهولا
ان درت قزازه بجيب الكولا
****
((بقلم إبراهيم العندي ))

عصفورة عمّك تنقو بقلم زاهر الطيب

عصفورة تنقو
فكرة زاهر الطيب
24/ماارس/2011
**
عمك تنقو عنده عصفورة
في كل مكان بقت مشهورة
**
بتجيب لي تنقو كل شمار
تخصص شكل وكشف أسرار
**
وعمك عامل فيها ماهر
خبير متخصص مخفي وظاهر
فاكر نفسه شيخ الطاهر
**
قال يا ناس ده علم ودراسة
حاجة كدا زي الحاسة السادسة
**
يا فلانه فلان قال بحبك
جاري وراك وماسك دربك
**
انت يا فلان قروشك داسيها
اولادك جعانه تقول ناسيها
***
عصفورتو تحوم في الناس تتصنت
خل الناس زي الجنت
**
زهجت العازة وشالت سكين
ضبحت العصفورة وبقى مسكين
**
قالت يا تنقو بلاش اوهام
تلعب بالناس كدا حرام

فول تنقو (2) بقلم إبراهيم العندي

• 
  
• 

  ابراهيم العندي 

  اندفق فولو خربلو هدوم
  واترتع يلعن ابو كلتوم
  فاتت منو الحاجه وطلعت
  وقدرة فولو اندفقت وقعت
  وقام من تاني يبل الفول
  فتح شوالو وراسو يجول
  وجاهو سريع العم حمقنجي
  يدور يشتري نص علبه برنجي
  وقال ياتنقو اديني سجاير
  وانا خرمان بل فولك طاير
  زعل العم من قولو وزين
  وزن القمشه ادا وقيتين
  وصرخ حمقنجي بروحو الحمشه
  انا يازول ماداير قمشه
  دايرلي برنجي بقولك هسه
  بدل ماامسكك اهرسك هرسه
  وتنقو اتصونج مابديك
  شوف طبلية آدم ديك
  قفز حمقنجي في ضهر العم
  وعض صلعتو وجاب الدم
  وجات الناس والدنيا اتقلبت
  وعمك يصرخ دمي انسكبت
  وجات عربيه من البوليس
  وعم حمقنجي الليله حبيس
  وتنقو بيضحك عاد مبسوط
  بس ياخساره الراس مربوط
  نص الصلعه وجاحظه عيونو
  حمقنجي هناك مطبوعه سنونو

عمك تنقو وبص الخرطوم بقلم/ فيصل عبد المجيد

Faisal Abdul Majeed‎

*** 

عمك تنقو صحى من بدري
قال متوجه وماشي الكبري
عمك شخى في شورط الجنزي
واصلاً هو ماشي يعزي
شرب الشاي معاهو رغيفه
ومافي في جيبو ولا تعريفه
قال متوكل وحنك الليله
انو مفلس وزول معدوم
عمك واقف في طرف الشارع
فجأة ظهر بص الخرطوم
عمك اشر وقال اتوكل
واول مرا معاهو بتحصل
انو الباب براهو بيفتح
من الخلعا بيقى بترتح
ومن تكيف البص يتوحوح
عمك كتكت من الزيفه
ونسى موضوع عدم التعريفه
فجأة ظهر عمك كمساري
 طول في عرض ووزنو مثالي
عمك فكر يكتل حيلو
ويركب ساكت ويتم توصيلو
الكمساري استلمو بحاجه
وطيرو ليك بفوق للشاشه

تنقو نجار (2) بقلم سارة جنقوما

تنقو النجار (2)
بقلم سارة جنقوما
22/مارس/2011
***

عمك تنقو بقي نجار
فكر ودبر كم افكار
قال حينافس ناس مارومينا
ويصدر شغلو عبر المينا
بدا ينفذ في أفكارو
وأجر دكان من واحد جارو
جاب حاجاتو والمنشار
وكم شاكوش وكم مسمار
بدا بي همه وبي اصرار
لازم يغيظ كل التجار
في نص أفكارو الشاكوش زاغ
واتحكر ليو في نص الساق
شتت عمك كل ادواتو
وجاب كبريت حرق خشباتو
وقال ياعالم اعمل ايه
الا الواحد يعمل بيه

تنقو مذيع (2) بقلم إبراهيم العندي

تنقو مذيع (2)
بقلم/ابراهيم العندي
22/مارس/2011
***
تنقو مزيع في قناة الشارع
مكفكف كمو كأنو مصارع
مسك المايك ونفسو الحار
نفخو اتجهز للاخبار
وقال بسم الله وبدأ في قرايتو
امامو اوراق وحاسوبو مرايتو
قال ابداها بخبر السوق
غلت السلعه ودا الخاذوق
حمحم وتمتم وشال نضارتو
وعد وضعها ختي سجارتو
في شفتيهو وولع ودخن
والاستديو اتكهرب وسخن
جاري المخرج تنقو غلطت
امام الكاميرا تولع إنت
وكل العالم شايف الصوره
خربت النشره قلبت سطورا
قريت اخبار السوق خليت
لخبر الساعه واتناسيت
تنقو اخير ماتبقي منافي
بالاول اقرأ خبر قزافي
جدع العم لسجارتو استعدل
والتصوير عادوه من أول
قال يامشاهد انا بستفرد
بي اخبار في قناتنا الاوحد
الليله الضربه بقت جويه
ليبيا سماها بقالو دويه
طائرات ثوارا تدك لفرنسا
وقزافي بيدخل اميريكا وهسه
حاملات طائراتو جوه الاطلنطي
والغواصات زي سمك البلطي.
لخبط تنقو النشره وجاطه
وقال قزافي مهاجم وساطه
وقال ايطاليا جوار يوغندا
وباكستان عاصمة ايرلندا
وجاب بنغازي بقلب امريكا
وجنب مصراته مراكش ديكا
وزاع اخبار الكوره وحالا
وقال المورده غلبت كالا
والمريخ اتعادل سلبي
مع برشلونه لقاء حبي
وامدرمان وهلالا الفاز
علي مرسيليا وده الانجاز
وبورتسودان شهدت في الميناء
هناك ادروب يصرع جون سينا
وفجأة الكهرباء قطعت قام
من الاستديو ضلاما تام
وخشم الباب المخرج قاعد
وباقي استافو معاهو مساعد
وكوم سيطان في ايديهم تظهر
وصاحوا جميع الله اكبر
وتنقو بيجري هناك اترتع
وعشره سياط في ضهرو بتطبع

عمك تنقو بتاع ورنيش بقلم محمد عبد الرؤوف

عمك تنقو بتاع ورنيش
مشاركة :Mohammad Abdulraof
20/مارس/2011
****

عمــــك تنقـو بتـاع ورنيـش
حايــم لافــي مع الـكورنيـش
لقالو شباب هناك جالسـين
قال تخفيض الجــوز خمسين
ملصولو شباطة وجزمة صوف
...قالــــوا اتــــــففن يلا نشـوف
مسـك الجــزمة وزعمط صوفا
جلــط اللون وقـال دي بـروفــا
شباطت النـاس ساب ألوانـا
برقــــع وجلبـط قــــال فــــنانا
الجماعة إنتبهوا وهجموا عليهو
ورنشوا وشو كمـــان إضنيهو

تنقو دكتور نسخة 2 مشاركة سارة جنقوما

نقو دكتور 2
مشاركة:ساره جنقوما
=====

عمك تنقو بقي دكتور
صدق نفسو وعاش الدور
ناس متزاحمه واقفين طابور
عمك صفق وكورك فيهم
اقيفو صفوف واستنو الدور
دخل الاول سليم ونصيح
طلع بعاهه جريح وكسيح
ودخل التاني بيشكي زهول
طلع من عندو كمان مشلول
بعدو الـ 3 عنده صداع
طلع يتحسف على عمرو الضاع
الناس بره اتهجمت وخافت
وسحبت روحه بعد الشافت
عمك كورك بعدو يخش
مافي جواب او حد يخش
طلع يسأل ايه المامظبوط
لقى حتى الكاتب ماموجود

الديك المكشن والحظ المكجن

تنقو والديك المكشن
فكرة زاهر الطيب
10/03/2011
***

عمنا قال ماشي زيارة
يزور القبة وشيخ الحارة
قال يا شخينا جاك فقير
اديني اوراد وانصحني كتير
قال حباب فقيرنا الزائر
إكرامك واجب ونديك الدائر
ساقو عمك بكل ظرافة
صينية مطقمة واحلى ضيافة
صنية مستفة لي براي
اكيد شيخنا ده عنده راي
رجع للشيخ زعلان يتنفر
قال يا شيخنا توب واستغفر
اقيف يا تنقو ما تستعرض
خليت الديك وجيت للقرض
عمك تنقو حظة اتبشتن
الي بيابا الديك حظه مكجن

القبطان عمك تنقو

قبطان عمك تنقو
فكرة زاهر الطيب
07/03/2011
***
عمك تنقو يخطط ويتكتك
عايز يسوق التاينتنك
ركبوا الوزراء وبقية القاده
قال يا اخوانا لس زيادة
جو التجار ووجها الامه
عمك قال ما احلى اللمة
عمك الله يديه العافية
كان في الباخره تجار المافية
بلاده عمك ما محدوده
قام اتوجه مثلث برموده
عمك تنقو زاد النكسة
غرق بالباخره وفيها الرؤسا
عمك تنقو اكيد غلطان
كان في الحلمة جد غرقان

حدائق عمك تنقو بقلم عثمان محمد

حدائق عمك تنقو
بقلم عثمان محمد
2011-03-05
==========

عمك تنقو الزول الفاهم
فتح لى حديقة قاعد وقايم
فيها أسود وقرود ونعام
...وحاجات تانية تقول ياسلام
عمك قال تذكرتو رخيصة
خمسة جنيه وهدية هريسة
عمك شهرين ما جوهو زباين
متحير قال أنا حظى الخاين
عمك فكر ودق اليافطة
وقال مجانى ومعاهو باسطة
فجأة الناس مزدحمة تصارع
ناس بى جوة وناس فى الشارع
بعد ما الناس كلم دخلوا
مشى للباب وبى إحكام قفلو
وفتح القفص الفيهو أسود
الناس مخلوعة وقالوا الموت
عمك قال كلام مجنوووون
العايزة يطلع يجيب مليون

تنقو وجلد السوط بقلم إبراهيم العندي (2)

تنقو وجلد السوط (2) 
بقلم /ابراهيم العندي 
=====


وجات العازه علي الدلوكه
قالت فارس تشبه ابوكا
دقت وغنت شكرت تنقو
قالت راجلي الشالع برقو
عمو اتحمس بالنقاره
قلع اتمركز نص الداره
ودق السوط عارفنو رجاله
وتنقو ادق وعينو شراره
والاصحاب جاينوا يشيلو
حلف اتكنكش الا يكيلو
فوق الضربه كمان ضربات
وعمنا حجر للدارت
لف ودور دمو يشرشر
جر عريسنا وساقو يبشر
فوق العازه تزغرد فرحه
وبي شبالها رمتلو الطرحه
وبعد الحفله رجع لي بيتو
وجرحات سوطو الطلعو زيتو
فوق الفرشه رقد بي بطنو
والعاز تشيل الشال وتعطنو
جوه الزيت المغلي تمصر
وفوق الجرحه تشيل وتعصر
عمك سكلب زغبر صرخ
قال اروروك الضهر اتشلخ
ضهرو اتنوثر رافض يشفي
وبيت عمك في المستشفي
جاتو الحمي يهضرب صاحي
وشال الليل ياناس صباحي
والدكتور شاف ضهرو شوارع
فاكر الراجل حرتو مزارع
حليل الضهر الاملس وساده
وعينو تعاني الليله سهاده