الشيف تنقو ( بقلم/إبراهيم العندي)

تنقو في المطبخ
بقلم/إبراهيم العندي
**

عمك تنقو جنه ودستر
خلط الباميه معاها الكستر
جوه المطبخ حك صلعتو
وقال للعازه ملاحك اشتر
ملحو مسيخ وبصلتو زياده
جر البمبر حالا صنقر
صاط الكستر جوه الويكه
وحش البصله يدمع فكر
فوق البصل كسر كم بيضه
ونادي العازه باصبعو أشر
جيبي الدكوه وجيبي زبادي
وناولي الفلفل داك والبنجر
وقربي يد الهون ياوليه
ندق التمر الوقت اتاخر
بلي عجينك وولعي صاجك
وهسي ملاح العم يتحضر
صاط الخلطه اداها الحله
وبالجركانه الزيت يتقطر
ولع نارو وقنب يفرك
وفوق العازه قعد يتبختر
بكره ملاح العم ياالعازه
في ونسات جاراتنا بيظهر
واي مناسبه في حلتنا
باكر فيها العم يتشمر
نزل حلتو جاب قراصه
من قدام العازه ودنقر
يغرف من الخلطه يملح
شيتا اسود وشيتا احمر
قال ياوليه تعالي اقعدي
نملأ بطونا وزين نتمنجر
اول لقمه العازه اتخنقت
وعمنا وشو اتورم اصفر
زعبرت الجيران اتلموا
ومن نخريها الدم اتفجر
وتنقو اتشقلب بطنو اتنفخت
وللمستشفي البوكس بينهر
وناس الحله اتلملموا جمله
وعمك في العمليه اتخدر
والدكتور سألوه الحاله
قال دي مبالغه مابتفسر
فاتح بطن العم بيفتش
عن القاعد جوه اتحجر
قال ياعالم اول مره
اشوف لي مريض مصرانو مشرر
الا يكون بالع جربوعه
او ماكلو ابنص تركتر